現年62歲的 Simon ，6年前經歷過人生低潮，切身感受過「男人最痛」，萬念俱灰之時，站在二十多層樓高的大廈天台打算一了百了，生死只差一步之遙…
Simon 曾任職銀行部門主管超過30年，管理20多名員工，賺取穩定可觀收入；擁有一個美滿家庭，與太太育有兩名兒子，一家相處融洽，生活富足，是社會大眾眼中典型的成功男士。所謂「食得好、瞓得好、住得好」，理應事事都好，誰又會想到風平浪靜的生活背後，原來充滿暗湧？
幸福背後，有一座壓力山
「當時覺得有能力嘅人，係唔需要同人傾，因為好瘀，好驚畀人睇唔起。」
2018年本身過着幸福生活的Simon突然被調職，被迫處理一堆不擅於應付的工作，壓力頓時倍增；工作以外，他亦要照顧患有自閉症的兒子，突如其來的工作變動，就如同在他原本已負重的肩膀上再加多一座巨石，讓他更感吃力，漸漸地開始出現一些抑鬱症狀。
「我本身比較內向，唔係好鍾意同人分享喜怒哀樂，亦係一個自信爆棚嘅人，成日以為自己有能力應付所有困難，唔使人幫。」「尤其男人，作為一家之主，覺得要更堅強獨立，有難題就自己解決，唔好煩到屋企人。覺得有能力嘅人，唔需要同人傾，因為好瘀，驚畀人睇唔起…點知直至2019年，終於壓力大爆煲。」
「當時我日日返工呆坐，完全履行唔到職務，後來被公司辭退，冇晒收入，出現巨大財政壓力，令我性情大變，成日鬧屋企人，自己又沮喪，後來前妻亦忍受唔到我，決定同我離婚…」
有一樣東西，比失業失婚更加痛
「嗰下我個心，好似部電腦突然Shut Down咗咁。」
人們常說男人的痛 ，是失去婚姻或金錢，但其實最痛的也許是失去情感連結。「嗰時我唯一生存動力係我個細仔，所以當時離開屋企後，日日都去撞下佢，希望見下佢，點知有一日，阿仔竟然同我講『爸爸，你唔好再搵我啦！』…嗰下我個心，好似部電腦突然Shut Down咗咁。」
兒子的拒絕加重了Simon的絕望感，再加上他當時身無分文，讓他感到窮途末路，最終冒出自殺念頭。「嗰時我企喺廿幾層嘅大廈天台邊，好沮喪，覺得自己點解會搞到咁？點解冇人體諒我？」一個人走到絕路，許多時候是因為一種執着與憤怒，但正正因為這份執念為Simon帶來了重生的轉機。
一下聯繫，一個重生的轉機
「我感覺到原來呢個社會，仍然有好多人好想幫我…」
「企喺天台嗰刻，我突然想搵人記低自己嘅故事，我想用自殺控訴社會！」為了留下生前事，Simon在自殺前花了點時間上網搜尋相關機構，結果在機緣巧合下，透過「Chat窿」網上聊天服務聯絡到香港撒瑪利亞防止自殺會社工。一切轉變，就由這一下聯繫開始。
「我好記得當時社工同我講，『你而家精神同體力咁差，思維決策應該唔太好，不如去醫院休息下，再慢慢諗下之後條路點行？』」社工的說話成功讓Simon從「自殺」邊緣拉回來，並前往香港撒瑪利亞防止自殺會接受援助。經過一輪跟進與安排，Simon被轉介到精神病院接受治療，住院過程中結識了同路人，並在醫務社工的協助下，獲得緊急援助基金及住宿安排，生活重生獲得保障。
「當時我認識咗一班病友，佢哋都有自殺傾向，發現好多比我情況更差嘅人，都好努力用自己方法掙扎緊。咁點解我咁蠢要自殺？由嗰時開始，我嘅自殺念頭就開始消失…，加上我覺得原來呢個社會，仍然有好多人好想幫我。」
少了一分面子 多了一份自主
「我發現自己唔係真係咁強壯，遇到困難時都會變到好渺小。」
事過境遷，由萬念俱灰到重拾希望，如其說Simon比從前獲得了更多的愛，不如說比起從前，放低了一些面子與自尊，也不再執着過去的風光。
「當時我冇選擇破產，因為覺得會畀人歧視，但後來發現當自己身份降低時，有一個圈子可以接受自己呢個身份，壓力就會減輕好多，雖然而家冇以前過得咁富裕，但周邊人充滿愛心，生活開心咗。」「作為一位男士，我發現自己唔係真係咁強壯，遇到困難時都會變到好渺小。人係群體動物，唔可以單打獨鬥，有問題要同身邊人分享，一齊諗解決方法。」
一個念頭，一步退後，世界不再一樣
「我會同自己講，我好叻仔，冇行前一步跳落樓，因為行前一步就乜都冇」
男人最痛可能真的很痛，雖然有時候我們無法避免痛楚，但卻可以選擇不讓自己那麼痛。一個念頭，一步退後，世界變得不再一樣。誰又會想到曾經歷過一無所有的Simon，如今神態自若，持着一副從容自信的臉容，娓娓道來過去發生的一段故事？事過境遷，「死過返生」的他如今最想對當日站在天台的自己說：「我會同自己講，我好叻仔，冇行前一步跳落樓，因為行前一步就乜都冇。」
現在他最想跟各位正受情緒困擾或有自殺念頭的人說：「一步之差就係生與死嘅分別。如其行前一步了結生命，點解唔重新出發，諗一條新嘅出路？」
Simon的新生活筆記
Simon的故事，相信也是不少香港男士的縮影。他們習慣了堅強，卻忘了自己同樣可以軟弱；他們勇於承擔，卻害怕成為別人的負擔。你的支持，能幫助我們在他們最絕望的時刻，給予及時的情感支援
捐款支持：https://bit.ly/3X1nyrc